Friday, 20 October 2017

EXCEL HMANG TAWH SUH

Excel leh Database software te hian in anna tam tak an nei a, chu chu ka sawi tum ber a ni lo, tun tumah chuan kan thupui ang hian database that bikna sawi ka tum a. Database nen an inan lohna hrethiam tur chuan excel chu enge a nih a, database software chu enge a nih chiah tih hi kan hriat chian hmasak a pawimawh ang.

Excel: Excel hi Microsoft Office Suite peng khat spreadsheet software a ni a, database management software a ni lo va, file management software a ni. Hard Disk-ah a mala vawn that (file anga store) a ni a, phone book lo siam dawn ta la, file pakhata i store a ngai a ni. Excel leh Lotus ang te hi chu file siamna leh maintain-na a ni a, database nena ngaih pawlh theih pawh a ni chiah lovang. A tangkaina ber chu data print nghal tur chhut nan, data khawn khawm nan. Database-a thun tur data lakkhawm nan company lian chuan an hmang nasa ber a ni. Chuvangin Database software te pawh hian excel-a data export theihna an nei deuh tlangpui thin a ni.

Database : database chu information inlaichin bik (related) lakkhawm sawina a ni a. Entirnan Phone Book database chuan heng information inlaichin bik: hming, address, phone number te hi a nei vek a, a len dan azirin heng aia information tam nei pawh a ni thei bawk ang. Database Management Software kan tih chuan information inlaichin bik te (information database) enkawlna, siamna, vawnthatna, sawngbawlna hmanrua (Software tool) kan sawina a ni.

Excel aia Database Software That Bikna

Flexibility : Program leh data te hi a hranga awm ve ve tur an ni a, data kan vawnna tanga data inlaichin lo te kan paih or tihdanglamin emaw kan vawn thatna physical storage kan thlak chang pawhin program chu kan thlak danglam a tul lo va, Excel-ah chuan program leh data hi a kal kawp tlat a, hei hi database software aia a flexible lohna leh that lohna chu a ni. Excel-ah chuan design leh data hmun khatah an awm a, hei hi errors ti tam tu leh logical tibuaitu a ni thin. Database-ah chuan a design leh data kha a hrangin a awm vek a ni. Excelah chuan data pakhat i paihin a design i siam that leh zel a ngai a, database-ah chuan engmah thlak danglam buai a ngai ve lo.

Fast response to information requests: Data te chu database pakhata an awm vek vangin, kan zawn duh vel zawnchhuah zung zung a awlsam bik hle a, excel anga file hrang hranga awm lovin database pakhata table hrang hrang te chu rang takin kan kochhuak zung zung thei a ni. Sumdawnna khawvela sum khawih nasa ber ber bank leh company te pawh hian database an hman chhan chu faster response means better customer service tih hi an hriatchian em vang a ni.

Multiple access: Excel file pakhat chu mi chi hrang hrangin vawi khatah an khawih thei lo va, khawih vaih se a buai anga, data hlu tak kha a chhe (corrupt) mai dawn a ni. Hetiang ang lo tak hian database software chu a rualin mi maktaduai pawhin khawih se a buai dawn lo a ni.

Lower user training costs: Database software te hi chu excel anga a hman dan zir chiam ngai leh thil by-heart teuh ngai ang kha a ni lo va, a hmangtu-in Mizo tawng a thiama, mouse a tihchet thiam chuan darkar 2 vel lekah pawh a zir thiam theih vek a ni. A hmangtu tan pawh productivity tam hle zawk tura ngaih a ni bawk.

Less storage: Database hian Excel te ang aiin space a heh ve lo va, redundant data  a awm lo bawk a, chuvangin excel anga data inconsistency a awm lo bawk a ni.

Security: Excel chuan Open File vekin thil a store a. Database tibuaia, eichhe thei virus mal sawi tur a awm loh laiin Excel Security hi chu a chhe hle a, virus laka data a him lo hle bawk a ni. Database-ah chuan security restriction kan hmang vek thei a. Excel-ah chuan password protect i hman pawhin data kha awlsam takin access theih vek a la ni tho mai.

High Level Data Manipulation: Data chu report hrang hrang siam nan kan hmang thei a, excel-ah chuan file hrang hranga i dah a ngai a, a chunga a that lohna kan sawi bakah khian hei hi a that lohna langsar tak a ni bawk a ni.

Easy Usage: Excel-ah chuan data leh design hmun khatah a awm vek avangin data dik dan ngaihtuah chung reng si a, a design mawina i ngaihtuah tel a ngai a, chu chu a thiam lo tan chuan thil buaithlak leh hun heh thei tak mai a ni a. Database software-ah chuan a design i ngaihtuah a ngai lo va, a data dik leh dik loh i ngaihtuah hah a ngai tawh lo, i raw data kha i provide anga, data calculation dik lo thei lo chu design mawi takah i hmuh mai theih bakah i duh dan ang thlapin format dang dangah i share leh vek thei bawk a, hetiang sharing hi excel-ah chuan a theih loh leh zel bawk a ni.

Data Recovery & backup: data recover leh backup hi excel-ah chuan a theih loh leh zel bawk a. Database-ah chuan i data recover theihna i neih mai bakah backup i nei tel bawk a, i khawl a chhiat or a bo vek pawhin i backup atangin i data i hmu let leh thei a. Bo thei lo tluk data awlsam taka khawih turin i nei reng tihna a ni.

Performance : data access chak dan hi hun heh lohna a ni bawk a, a pawimawh em em a, excel-a fee report siam tur chuan typing thiam tak i nih a ngai a, excel nuam ve pangai taka i hman thiam a tul a; excel calculation hi 100% accuracy a ni lo tih hi mithiam te sawi tam a ni, a chhan chu virus leh bug velin a tibuai thei tlat a ni. Database-ah chuan typing thiam miah lo pawhin fee report i siam thei a, mouse vawi 3 vel click a ngai mai chauh a ni. Keyboard-a type tal i duh pawhin Keyboard shortcut key pahnih vel hmeh a ni mai.

Searching: I data sang/sing chuang zinga pakhat leh thur chhuak duh ta la, excel hmang chuan i mit a that pangai viau chuan darkar fe i hman a ngai mai thei. Database hmang chuan minute khat pawh i mamawh lo. Entirnan, skul naupang pakhat Lawma chu naupang sing chuang zingah i zir chiang duh ta a, database-a i dah chuan a hming atangin awlsam takin a rei berah second 10 velah i hmuchhuak thei nghal a, a mah ber i hmuh tawh chuan a result te, a certificate te, a behaviour report te, a fee report te, a id card te i access thei nghal vek a, excel hmang ta la, engtianga nasa takin nge i buaipui ang tih chu ngaihtuah ngam chi pawh a ni lo.

Result Siam nan: Tunlai school tam berin an buaipui chu note checking, test checking te hi naupang thiamna teh fung leh endikna tha ber a ni tih hi, chuvangin private school-ah phei zirtirtute naupang test checking in an buai reng a. chutah an mark hmuh chu CCE kalphung mil turin nasa takin calculator nen an han chawk chhuak leh dap mai thin a, an hun leh tha an seng nasa hle, naupang mark chhut nana an hun leh tha sen kha checking nan hmang zawk ta se, checking uluk leh zing zawk pawh an tithei ngeiin a rinawm a ni. Chumi tihawlsamna kan hmuh hnaivai ber chu sapho leh vaiho hman duh tawh loh inconsistency ngah leh maintain buaithlak tak mai excel spreadsheet hi a ni. Excel chuan marksheet or progress report card a siam theih nghal loh a, chu chuan hna a ti tam leh a, percentage calculation te hi background value vangin a dik lo thei tlat mai, naupang result dik lo kan siamsak thei daih a ni. Ranking chawh nan phei chuan excel rank function te hi a lem ang leh chauha hman tlak loh a ni. Chuvangin database hi kan intihhmuh a tul ta hle a ni. database-ah chuan data leh design a hran avang hian engkim hi a kaltluang thlup mai a. Zirtirtu-in a check-na mark a rawn submit kha enter luhin marksheet, progress report card te, ranking, grade, percentage, cumulative evaluation, grade point average, etc. te kha kum 100 kal ta mi pawh nise second 10 chhung lekin kan print chhuak chur chur thei mai a. Excel-ah chuan hetiang thil hi a theih loh mai ni lovin a theih loh bur a ni. School Principal te tan database software hi a tha hle a, i data chu i ta a nih ang takin excel thiam kher lo pawhin awlsam takin i control thei a, tuna i information neih hmang khan i hmalam hun lokal zel tura hmalak dan thiam a har tawh lovang.

Excel that lohna: Excel siamtu Microsoft company hrim hrim pawh hi an lian a, hmelma pawh an ngah a, chuvangin virus lakah an him lo hlawm hle bawk a ni. Excel hi thil ho te te calculation nan chuan duhthusama rang leh tha a ni tih chu hai rual loh a ni a, thil lian thamah erawh buaina neuh neuh a ngah hle a ni.  Chungte chu:
  • Microsoft thil design sual pakhat internal calculation tana floating points number an hmang hi a ni.
  • Excel 2007 leh 2000-ah 850*77.1 hi 2-a sem kher loh chuan zu calculate dik thei hauh lo mai a.
  • Excel chuan 40000.223 hi 40000.2229999999-ah zu ngai tlat pek a. 41000.348 pawh hi 41000.3479999999 angin a ngai a, 52000.723 pawh hi 52000.7229999999 angin a ngai tlat bawk a ni, mahse a ni si lo.
  • Excel-ah hian calculation tih a awlsam ang bawkin tihsual a awlsam bik em em bawk a ni.
  • Excel calculation thiam tur chuan rounding kal hmang hriat thiam a ngai hle bawk.
  • I data a len viau chuan excel chu a muang tawh hle ang.
  • Excel hian Memory leaks a nei sam viau bawk a, ram leh graphic hmanga in chhan him theih pawh a ni lo leh nghal. 65,536 bak rows a awm thei lo.
  • Excel hian content security chauh a nei a, location security a nei lo.
  • JPMorgan’s internal investigative task force te chuan 2013 kum tir lam khan Excel Spreadsheet hi an zir chiang a, calculation dik lo leh a data representation dik lo an hmuhchhuah hnem em avangin khawvela worm hlauhawm ber Iran Nuclear plant run tura an siam stuxnet te ai pawha hlauhawm zawk ang hialin zu chhuah a, hei hi Khawvela chanchinbu lar ber te zinga mi Forbes chhuah ngat a ni. (Source: Microsoft's Excel Might Be The Most Dangerous Software On The Planet : Forbes Magazine).
  • Goldwater at the University of Massachusetts entitled, "Using Excel for Statistical Data Analysis - Caveats" report-in a tarlan dan chuan Excel hi statistical analysis tan chuan a tha hlawl lo tih a ni.
  • "On the Accuracy of Statistical Procedures in Microsoft Excel" by B.D. Mc Culloughan and Barry Wilson chuan excel version hrang hrangah te hian dik lo(bug) a tam avangin a function then khat leh formulae pawhin result dik lo pek chhuah theihna chance an ngah tih an hmuchhuak.
  • denizon.com-in excel that lohna hrang hrang a tarlan te chu: tihchingpen a awlsam(vulnerable to fraud), mihring tihsual a tam duh bik (susceptible to human errors), enchhin leh tihdik a harsa bik (difficult to troubleshoot or test), regulator compliance kalh tlat a ni (obstructive to regulatory compliance), business thil khawih zung zung nan a tlak loh(not fit for agile business practice), a huho-a thawhhona tur siam a ni lo(not design for colloborative work), report lakkhawm nan hman a har lutuk(hard to consolidate), decision siam zung zung nan a lak tlak loh (incapable of supporting quick decision making), business kal zel nana hmanrua tan a tlak loh (unsuit for business continuity),  scale poorly, etc.
Excel leh Database Software in anna chu data khawih nana hman ve ve an ni a, i mamawh hun leh a hmanna hriat hi a tha hle bawk a ni. Thil liantham khawih nan chuan Excel chu a hman tlak loh va, list tlem tham te te khawih nana hman hi a tha ber a, a him bawk a, tih dik loh tihdik pawh hriat a awlsamin tihdik pawh a awlsam bawk a ni.

Database Software hman hun.
  • i information chu a len/tam viau a, spreadsheet form-a manage theih a nih tawh loh chinah leh subject nei bik data a nih chuan.
  • Data chu nakin zela hman i tum chuan
  • i information chu danglam thei reng a nih chuan.
  • i information atanga report siam i mamawh chuan database tluka tha a awm lo.
Excel Spreadsheet hman hun...
  • list tlem tham te-a calculation i siam duhin.
  • list tlem tham te-a thil track nan.
  • i data tanga chart leh graph i siam duhin.
  • What if scenerio i siam duhin.