Saturday 5 November 2016

Framework te hi eng teh ual an lo ni lo....

(Framework hi Laravel leh Code Igniter bak hi chu tih takzeta khawih ka nei hran lo va, heng pawh hi ka thiam tawk loh vang leh zirna hun ka insiam hman tawh loh avangin ka chawlhsan tawh a, core language leh libraries erawh ka khawl ten tun a, Framework aia programming language thiam duhte tan Peteris Krumins' (https://www.browserling.com) a thuziak ka rawn dahchhuak ve e). 
Framework hi software development-a anti-pattern (Bad programming practice) lian ber a ni a. Zir a har a. Project an ti complex-in thil dangah a in nghah tam em em a. A enkawltute’n an peih loh san hun hun kha an tawp hun a ni mai a. Chhan mumal tak awm si lovin version thar a lo chhuah apiangin i in update a ngai ve zel a. Buaina i tawhin midang tanpuina leh thurawn dap a ngai a. Framework-in feature a neih zinga tlem te bak i lo mamawh a lo ni reng thei a. Eng teh ual a lo ni lo.
Framework aiah helper libraries leh abstraction mawl te hman pawh hi a thlanawm zawk a, chung dang zawng ai chuan core language thiam hi a hlu zawk. Software chu mawlmang thei ang ber, thil danga in nghat tlem thei ang ber leh tuna tang kum 20 hnu pawha la hmantlak tura fundamental tool (core language) hmanga hun, tha leh zung seng tlem thei ang bera develop tur a ni a. A nihna takah chuan Framework hian software siam hi a tiawlsam hran lo va, a ti complex zawk a , pumpelh tum hram hram tur a ni. Thil complex reng reng chu a suala sualchhuah ngai vek an ni a, Framework hi ka hmang lo va, hmang tura midang fuih phei chu hla tak a ni.
Browserling-a software siam chungchanga kan dan pawimawh tak chu a tam thei bera core language hman tur tih a ni. Framework hman tulna chhan tam tak a awm thei ang. Mahse tun thleng chuan framework pakhat mah kan la hmang lo va, kan thilsiam duh chu library then khat leh core language hmangin kan la ti vek thei a ni. Then khat chuan Framework hman tul leh hman ngei ngei ngai angin an sawi a. Browserling-ah mawlmang taka thil chinfel theih hi kan thupui ber a ni. Ka hnathawk te chu framework engmah hmang lo turin ka ti a. Problem an neih reng reng core language leh tools hmanga chingfel vek turin ka ti mai thin.
Framework aia core language hman a that zawkna hrang hrang ka hmuhdan te chu:
Framework te hi thiam har leh thiam tul lo an ni: Framework zir hian hun a heh em em a, fundamental tool leh core computer concept leh programming kalphung dik tak zawm lovin thil eng emaw bik tihna zir ang chauh i ni dawn a, a daih rei lo vang. Thenkhatin framework an hmu chhuak a, chu chu thenkhatin an lo hmang a, i hman ve kher a tul tihna a ni chuang lo. Chu mi kha mi chuan a hmang a, ka hmang ve dawn, tih leh ringawt thin hi a zia lo. Programmer dik tak chuan Framework tel lovin tih hi kan ngaihtuah tur a ni a. Ka thil duh siam puitlin nan eng feature leh core concept nge kan mamawh tih te, heng kan feature duh ang te hi framework tel lovin code line za vel lekin ka siam ve thei em tih te, he framework hi tute siam nge? kum 2/1 lekah an thil siam hi an hnuchhawn leh mai lawng maw tih te, kan ngaihtuah kim tur a ni.
Framework hian kan ngaihtuahna hmanthiamna a tizim: Framework hian kan ngaihruat thiamna zau zawka hman min phal sak lo va. Box pakhat chauh chhunga kan ngaihtuahna sawrbing turin min phuarbet tlat a ni. Chuvangin mawl tak bakah a chhuah lo ang che. Buaina i tawh a, tih ngaihna i hriat loh tawp khawkah pawh framework chuan a tih theih bakah engmah a tihtir hauh dawn lo che. Mithiam zawk te i rawn reng a ngai ang a, i tha leh zung i seng thlawn tam lutuk dawn a ni. Framework siamtute kha i thil siam duh apiang i siamtirin framework kalphung i thlak kual tir thei ngawt lo bawk. A nihna takah chuan i productah chuan thuneitu ber i ni tur a ni.
Frameworks te hian i project an ti complex-in thil dangah an innghat tam: Thil danga innghat nasa lutuk leh complexe lutuk thil reng reng hi engmah tlo reng a awm lo. I project chu enkawl nuam leh thil danga in nghat tam lo thei ber a ni tur a ni. Project complexity leh dependency chu enkawltu an awm loh chuan thil danga in nghahna a sang tulh tulh ang a, a tawpah phei chuan framework sawm hnih chuang leh language chili chi nga lai i lo hmang reng thei a ni. Project-a tool i hman tur chungchangah dan khauh tak zam tura thutlukna siam mai loh chu tih theih i nei lovang.
A tirah kalphung awmze nei hmang em em lo pawhin framework tharlam ber ber i hman theih leh thiam vang chuan i lang cool viau mai thei, mahse hun a lo rei a, i application chu nasa takin a lo complex chho tan a, i application hnathawh dan kalkawng pawh i lo bo ta map mai. Enkawl hleihtheih pawh a lo ni ta lo. A tir thla hnih thum velah chuan thil hi tih deuh zung zung theih angin lang mah se, i project-in hmalam a pan zel khan i team te hnathawh a muang ve telh telh ang. A chhan chu thil dangah i innghah tam vang leh i application chu a lo complex tak em avangin. I application enkawl turin hnathawktu tam zawk i lo mamawh tawh ang. Thiamna bik nei mi tam zawk i mamawh tawh dawn tihna a ni. I lead developer-in a mangtha ni che chu i tawp ni a ni ve nghal ang.
Complexity hi lo lakluh mai chi a ni lo va, a suala sual chhuah ngai a ni. Framework leh Library kan hman tam zel hian kan project chu kan ti complex tulh tulh tihna a ni. Chuvangin Framework leh library hi i ni khatna ni atangin pumpelh nghal ang che.
Framework te hi ruah mual liam ang an ni. Framework hmuhchhuah tam zawk hi lo lar huk a, a thar dangin a rawn luahlan leh mai thin. Ti chuan framework thar chu a tirte atang bawka i zir leh a ngai ang. Tha leh zung, sum leh pai sen a ngai ve bawk. Framework hlui tih tak zeta i lo zir chu a thar a lo chhuah avang chuan i hnuchhawn a ngai leh si. I thiamna lo neih tawh te chu hmantlak loh an lo ni leh ta.
Miin framework thar that zia leh hman nawm dan te an lo tlangaupui ta a. Chutiang thiam lo bik nih chu i duh hauh lovang le. Mahse rilru sen hah lohna turah i rilru i seng thlawn ang lek chauh ah ngai zawk rawh. Core fundamental tool te hian framework-in a tih theih ang chu an ti thei vek a. Thil thar engmah solve theihna nei bik pawh ni lovah i hun i sengthlawn lek chauh a ni. Framework chu a lar poh leh a rintlak loh leh zual tih hi hriat tur.
Hei aia chanchin lungchhiatthlak leh zual chu Framework author thenkhat hi an project hi an nin chinah an hnuchhawn hmaka an delete leh hmiah mai bawk thin a. Author pakhat vangin i build zawng zawng a buai vek thei. Core fundamental tool hman nasat hi a thain hun lokal leh zel turah pawh rintlak ber tura ngaih a ni.
Framework te hi inthlak danglam chho reng an ni a, chuvangin kan framework version leh a dependency te kan update ve reng a ngai thin: Framework te hi a version thar an siamchhuak chak ang reng hlawm hle a, i in update ve zung zung loh chuan thil thar i zir reng a ngai ang. I code update-in i buai thei viau bawk ang. Framework developers'ten functionality eng eng emaw an dah te hi kan mamawh ber an ni hran lo va. Kan mamawh loh tawp an ni duh tlangpui.
Chhan mumal tak awm si lovin framework developers te hian an project hi an update ve reng a. A tlangpuiin software chu tih tur chin kan siamsak a, dik leh fel fai taka a tih theih chuan update emaw thlak danglam a tul vakna a awm lo. Software hman tlak leh tha te chu kum 10/20 kal taa an lo siam tawh te kha an ni zawk. Chhan mumal tak awm si lova software version update vak hi anti-pattern lian tak a ni. Software chu version X-ah a that fel kim chuan chhan mumal tak awm si lo va upgrade a tulna pakhat mah a awm lo.
Midang pum reng ngai hi: I framework hman laiah buaina i lo tawhin i chinfel dan hre hlauh pawh ni la framework-in tihtheih chin a bithliahsak bak che in engmah i tithei lovang. Mithiam zawk(expert) puihna i mamawhin sum seng hial i rawn pawh a ngai thei. Thil dangah i innghat tam lo a nih chuan mithiam (expert) chu nangmah kha i ni mai.
Framework feature tlem te bak i lo mamawh lo: Ka thilhriat zin em em chu thenkhatin ropui takin framework hmangin project an khawih thin a, chutih laiin framework atanga an mamawh tak tak (feature) chu tlem te chauh a lo ni lawi si. Hetiang hi a nih avangin an project chu an tikhawlo der tihna a ni hial mai. Project i khawih dawnin 'Eng framework nge ka hman ang tih' i lo inzawt thin a nih chuan i tisual hle tihna a ni ang. I project chu engmah lo atangin tan la, programming leh helper libraries tlema zawng hmang la, tha takin siamchhuah tum zawk ang che.
A tul hunah chauh framework chu hmang ang che: Framework te hi hmanna awm hlo leh laktlak loh ber chu an ni em bik lo va. Image processing, sound processing leh machine learning -ah te chuan code tam tak hmanga siam a ngaih avangin framework te hi an hman tlak ve ang.
Thiante u, framework hi in thiante hmantir lovang che u.

No comments :

Post a Comment